February 25, 2012

說了「不結婚」的這天

唔開心事一籮籮。

任誰都知,結婚從不是兩個人的事,遇上第三者產生的問題,再煩,用心解決就好;但要是有人惡意相向,再煩,也只能一直煩下去,因為對方是老公的家人,論輩份也比我高,一切只能接受。

事件始末,一言難盡。

我只是想表示友善,相約食飯,早知這頓飯不易,也知對方一向對我不存好感,所以就更加要吃這餐飯,誰知,整夜談話不單不和諧,更甚是九成負面得嚴重。

1, 對方說我令陳生的前女友suffer很多
2, 我進來後令陳生成個家庭沒從前般融洽
3, 我令陳生變得自閉, 好少再出去跟她們聯誼, 意指我挾制陳生不讓他出去玩
4, 叫我唔好再出席咁多家庭活動, 以免氣氛不好
5, 覺得我唔可靠, 說陳生應該揀前女友做太太, 因為她感覺比我穩陣
6, 不斷說陳生前女友有幾咁好, 而我有幾唔好
7, 覺得我不投入任何家庭活動
8, 最hurt的, 是她說陳生提出同我結婚時有猶豫, 說陳生不過是想俾安全感我先結婚, 而當我問起陳生這事時, 他沒有作聲

我,正如前文說過,向來不是容易討好人的人。

所以我一直努力,特別是對陳生的屋企人,這方面,我問心無愧,縱然仍有很多事情做得不夠好。

問題係,事到如今對方跟我說這些是有何用意?

我沒做什麼開罪了人,要討厭我至此嗎?

不明白,亦不想去明白,正如我問陳生說:「你覺得我有盡力過嗎?」他說有,那就好了,而我亦只懂做到如此。

陳生重視家人,我會被同化,即使我從來不懂與家人相處,但我願意努力學習,只希望人家給予機會,可惜有時這種希望是種奢望,人家未必慷慨。

還結婚嗎?

我向陳生說,不結婚了,於是,他激動了......
難道我心底裡真想放棄嗎?
我千萬個不想,但當面對不懂解決的事情時,便選擇逃避。

朋友說,不要意氣用事,最重要是二人相處得好。

是嗎?我不認同。

但,事至此,沒奈何。

11 comments:

  1. 加油! 用時間和行動令對方對你另眼相看吧
    有時都唔知自己為咩結婚, 但開始左就繼續努力吧, 隨遇而安! 所有野都注定的

    ReplyDelete
  2. 講依D說話係陳生邊位長輩? 媽媽? 我最好奇係"她說陳生提出同我結婚時有猶豫, 說陳生不過是想俾安全感我先結婚, 而當我問起陳生這事時, 他沒有作聲..." 點解陳生唔出聲呢? 雖然唔知依位長輩係邊個, 但陳生都應該要出聲呀!...妳知道嗎? 我剛剛正閃過不如不結婚, 就見到你依篇BLOG,不過並唔係佢屋企人唔鐘意我之類, 而係我有點質疑依個人適唔適合同我一齊生活,我工作上好大pressure,又做得唔開心,呻了兩句,話第2時生左仔會搵返無咁大pressure準時收工既工,點知俾佢話,話我無事業心...我聽到真係oh my god! 好早前係佢話想我第2時生左bb唔駛返工, 專心湊bb, 但我知道無可能, 因宜家生活樣樣要錢, 所以我唔介意生左bb都做野, 但想搵份無咁辛苦做得開心d既工, 估唔到咁就俾佢話我無事業心, 我真係好想喊, 佢好似愈近婚期就愈變質, 琴晚post左部份pre-wedding係facebook又俾佢話post哂出黎無哂神秘感! 今晚試晚裝新貨, 琴晚我姊妹話病左陪唔到我, 我叫佢陪我,佢琴晚就質問我點解唔叫邊個邊個姊妹...真係樣樣野都俾佢話一輪, 佢已經唔似以前咁樣諒解我, 我真係唔知以後點同佢生活...加上煩緊住屋問題,又怕請既人好多唔黎,,結婚又洗咁多錢,真係有一刻唔想結婚~唉

    ReplyDelete
  3. 我覺得.. 既然對方講到佢前女友咁好你咁差, 就更加要結婚.. 做得更好令佢跌到一地眼鏡!! 同埋佢話陳生提出同你結婚時有猶豫.. 佢自己亂估jar? 我見平時係FB到陳生對你咁好, 完全唔似lor! 佢無出聲唔代表佢係猶豫, 你知男人嫁啦..

    ReplyDelete
  4. don't say things that you don't mean it! talk to your hubby! cheer up b2b!

    ReplyDelete
  5. 問:您嫁給他還是嫁給他的家人呢?
    您也識說結婚是兩個人的事,其他人還須去理會嗎?
    重是家人的男人是好,但重是妻子的男人更加難得啊!
    沒有他們;您倆就結婚不成?

    ReplyDelete
  6. 其實真係好HURT.......有時我男友都親友係到講3,講4時, 我男友唔作解釋...我都會好唔開心, 佢只會講, 我地自己明白咪得囉...真係會好唔開心, 如果你以上果8點, 我咁樣比人話, 我真係唔想結婚, 點解要嫁得咁辛苦........不過你倆一定好愛大家先結婚啦, 希望事情可以解決, 開開心心結婚去...

    ReplyDelete
  7. wtf, 很討厭從中搞是搞非的人, 最慘她還要是對方的長輩....不會是外母大人吧?但是姨媽姑姐也不見得容易應付....如果此人懂得大體大慨不會說出以上的話來, 人家結婚不"鄧"人家開心還要在說三道四, 很可悲....結婚從來不是兩個人的事, 是兩個家族的事, 如果陳生堅持的話你可以放心, 反之則要謹重考慮. 愛護家人很好, 但男人也得保護自己所愛的人免於受傷害!!! 這個壞心腸的人之後還有很多機會碰面嗎? 可否避之則吉?

    ReplyDelete
  8. 見到你呢篇網誌,真係火都黎埋。
    一個人, 最難面對係咩? 就係面對自己既不是之處。
    我唔識妳,但從妳字裡行間, 幾可發現你係一個非常自負之人, 俗D講即係「我有我自由,理鬼你感受」的人, 即係一貫港女模式。
    從你列出的八點來看, 你一定有問題, 對方亦有問題, 知唔知咩叫做「一隻手掌拍唔響!」我唔知對方前輩身分係咩?影響有幾大,呢點你冇講, 做過記者寫文都咁「那西」?
    結婚,本來就係開心事, 但我唔覺得你開心, 你結婚為咩? 係唔係真係俾人一矢中的呀, 其實就係一心要篩實個男人, 要佢俾到安全感你呀? 即係為結婚而結婚,咁就死得啦!
    講真, 成件事你先至係當事人, 有咩後果都係你自己去承擔。不過最重要係妳自己有冇諗過 :
    1. 自己接唔接受到第二日離婚,被冠上一個「失婚婦人」之名?
    2. 點解要結婚? 係咪為結婚而結婚?驚第時冇人要而結婚? 為滿足個人或者母親願望而結婚?
    3. 都28歲人了, 仍然做事on99咁, 唔好下下都諗對方不是, 諗下自己有咩問題啦, 唔好用咩已經主動約對方食飯呀之類為自己開脫, 有冇諗過點解人地會咁諗? 有冇認真檢討過自己?
    4. 我唔似其他網友一味死撐妳, 講真……你呢段婚姻, 五個字講哂:「唔結好過結!」……係咁!

    ReplyDelete
  9. 理解你說出這話的原因,但會成為你們關係的一根刺嗎..?

    Dap,明白你的不好受,但...拋下那一句說話,如何收拾殘局?

    很擔心你...好好地去溝通再牽著手面對問題和解決呀!

    祝福你..忍一下~

    ReplyDelete
  10. Dap...不用不開心....因為我都有類似經驗....最主要是一些人不大喜歡自己...但我對自己說if 我真的愛他...便要學習了解...

    ReplyDelete
  11. airnote bridal atelierMarch 7, 2012 at 9:05 AM

    最緊好忙少左嚟你個blog度探你.. 唉~ 傻瓜, 唔好理人地點諗啦~ 結婚係你同calvin既事. 慘得過calvin揀左你啊~ 係咪~ 正能量啊正能量~

    下星期搵日約你俾掃你! 你個佬仲有冇用生眉素?

    ReplyDelete

Translate