June 30, 2011

土炮buffet

要數近期最hit的自助餐,一定是Hotel ICON的the Market。





新開的Hotel ICON是本土品牌,由理大斥資13億元興建的教研酒店,內裡好多職位都會留俾理大讀有關課程的學生實習。也許自己人都愛幫自己人,而且想睇下香港人究竟run唔run得掂deluxe酒店,所以好多人都來捧場。

**其房間最平的都$2,000起啊,比朗豪酒店還要貴。



我有興趣,主要因為陳生。



他是理大畢業生,當在婚紗展時知道這家酒店開幕已經癲o左,只是婚宴min
charge高,大約2x0k(印象中,好似260k-290k)。在我不知道廚師班底陣容,看的interior
pic也只是電腦合成時,叫我如何有信心俾這個價錢在這裡擺酒。(Btw,公關同我講第一單婚宴的男主角也是消防隊長來的~~^^)



因為有興趣,所以公關A一邀請我便赴約去。







午市$218/位、晚市 $408/位。

坐的環境一般,d檯擺得有點混亂,然而全店採取落地玻璃設計,滿室自然光,幾舒服。據講餐廳是由英國頂級設計師Sir Terence Conran設計,以香港街市作藍圖,所以成個感覺帶點型,又有點local特色,感覺幾熱鬧。





放食物的環境就幾好,熱葷區空間感足,沙律、甜品另外設在近門口區,冷盤也自成一國。多個live stations列在最角落部分,唔會太油煙,設計不錯。



因為一入門口就係甜品區,所以講甜品先。每日有約10款甜品供應,芒果卷蛋、草莓忌廉橄欖油蛋糕、綠茶奶凍、檸檬撻、紅桑莓朱古力蛋糕,全都有水準,另有pancake配Movenpick雪糕、珍多冰和自製雪葩。

甜品師傅曾在COVA及the mira任職,唔...... 本來信心麻麻,不過試完,證明沒有令人失望。同埋手快有手慢無,像芒果奶凍超搶手,轉頭就無。





最抵讚係,cake shop(需付錢的大蛋糕)也有mini版給試食,大可試o岩心水先買走。(見到下圖大蛋糕後的小小件嗎?)

唯獨這個marcarons真係麻麻地。

冷盤呢~ 沙律陣容一般,不過醬汁超多,有近10款。

海鮮吧有加拿大長腳蟹、澳洲青口和翡翠螺等,晚市則會配備生蠔和龍蝦。

我發現香港人真係好鍾意食海鮮,我由頭坐到尾,見住檯檯不停添海鮮,好似食極都唔夠咁,我就因為唔多識拆骨和o累骨,所以除了生蠔,其他都係唔好搞我。

刺身方面,中規中矩,沒特別好吃的。

陣上除了薄牛肉、冷肉platter、煙三文魚,另有一部機即片意大利風乾火腿,鹹香足,算交足功課~~



主菜喇,公關話呢度的buffet係主打東南亞theme,所以星洲炒蘿蔔糕、叻沙都係重點。兩款我都有試,幾鍾意,只略嫌叻沙湯頭欠辣勁。(是我吃開的都不正宗嗎?我也不知,因為本就不好。)

好樣衰的星洲蘿蔔糕,但幾好食。

這就是叻沙,由新加坡師傅駐場現點現煮。

巴東牛肉、意式薄身Pizza、燒羊架牛扒、串燒、點心、生滾粥、印度咖喱...... 食過幾款都唔錯,印象最深係白汁忌廉海鮮,通常只為"陪坐"的它,用料很新鮮,醬汁濃而不過稠,想不到是最出色的一環。燒羊架,啖啖肉,羶香不俗。

上面的爐,用來烤薄餅~ 不過唔知點解內裡放滿下面這堆肉,莫非也有"興"住的作用?



聞說個粥好得,不過我認為即滾即食的粥不會入味到哪裡,所以沒有試。

晚市來,會多添海南雞飯、即煮意粉等食品。整體而言,四百元不算貴~~(也許新開之故,據行家講連平日都爆場耶~~)

有D唔明點解即煮意粉要夜晚是有~~

整體感覺...... 唔...... 算係Buffet中有點新驚喜~(地點新、環境新、感覺新嘛~)可以一試,愛甜品者必到。


The Market



尖沙咀科學館道17號 Hotel ICON 2 樓



3400 1308

自助餐供應時間︰午市 12nn-2:30pm 晚市 6:30pm-10:30pm

這刻...

這刻的明珠台很好看......

By the way......

我認,講人是非幾開心。

June 29, 2011

好貼唔貼死標籤

大家逛超市時,會留意食物標籤嗎?

我會,因為減肥期間要留意sodium、糖分及飽和脂肪的含量。

有時就因為工作,要知道一件食物係咪高質素,某程度上可以從「Ingredients」開始。

早前我為了做玫瑰花醬,便去了"超級城市",準備買回公司影相。

恕我無知,見到Confit Petales de Violettes時,真的不知道Violettes的意思。



於是我便擰去後面,睇招紙簡介。

點知俾個類似營養標籤(其實係後期貼上去gei成份標籤)的物體貼住了最重要的部分!

無錯,呢樣係我最想講gei。

我曾經問過TASTE的店務經理,究竟點解D超市咁鍾意將後期加上去gei標籤貼在ingredients呀、cooking method上。

你貼住o左,我點睇?

同埋反正你都係貼英文,咁點解要貼呢?(個件product本身的招紙都係寫英文ga啦!)

佢gei答案係:最主要係因為無其他位貼;(好明顯係有啦~~)那我就不知道了,只知一來到店,貨品已經被貼上標籤,不是我們這班前線人員負責。

OK,答完等於無答。

問題係,呢班人亂咁貼,重要的information被遮住之餘,仲要貼錯資料!

講返事緣,我不懂Violettes這個字,於是睇標籤,見到「Rose petal」,咁好明顯係玫瑰花瓣啦!

於是就買回來,到上網睇返FAVOLS呢間公司的資料,先知原來買錯。

真正的玫瑰花醬,應該叫Confit Petales de Rose......

這令我再一次恨死呢D標籤。(是你自己白痴啦!...... maybe~~)

所以以後大家購買時真係要睇清楚,要不然,好似我咁,無理地"mit"走那張標籤......

Though其實好鬼難"mit"!

但作為消費者,我有權利去知更多,至少,我都要知點煮ga,你遮住個cooking method真係有點難接受lor~~!

薯餅夾麵包

曾經我好鍾意食麥記的早晨全餐,有一個特別食法,更是從小到大至今不變的:

薯餅夾muffin包。

對,那兩塊乾"真真"的麵包,我從不塗果jam,而只會夾薯餅來吃。

因為覺得又軟又脆的口感幾好。

那時我老是問:點解只有11am前有薯餅?

某人答:這是市場策略嘛,要是連下午都有薯餅,誰還會特登為了薯餅來幫襯麥記的早餐!

Btw,重點係,今天麥記終於出o左一款夾住薯餅的包喇!

↓↓↓ 煙肉脆薯漢堡 ↓↓↓

兩塊頗鬆軟的包(口感比漢堡包的包還好~~),夾有洋蔥、薯餅、煙肉、牛肉漢堡和芝士,另配兩款醬汁。(高卡到咁,我幫佢改名叫肥仔包~~)

睇相,好靚。(i mean麥記裡面個張廣告相)

但一打開......

好似都ok吧~~ 揭開塊包睇睇......

嘩~ 塊煙肉掛邊!

唔知真係以為好足料!同埋張相明明塊薯餅係圓形,塊漢堡仲大過個薯餅,但好明顯同現實不符。

其實我都應該預計到,因為麥記一向好會做marketing,而且只會將本有的食材做mix & match,變成好似好多款新食品,但其實都不過是左搭右右搭左。

味道方面,也ok,至少薯餅是脆的,有我預期的脆夾軟滋味。

薯餅面層的黃色醬也不錯,微辛,頗香口,但就是吃極都吃不到是什麼醬!

誓估唔到塊漢堡扒下面竟然仲有類似黑椒汁的物體!非常古怪。

所以整體係...... 6分。值得一試,但別抱期望。

另外,我仲發現到她們的魚柳包縮水縮得好過分!

袖真到,好似個D食物模形咁~~

以前我食魚柳包,點都要用兩隻手拿著來吃,現在...... 一隻手也有空隙。

依家成$30一個餐,薯條唔熱都算(枉佢地仲sell自己現點現做),連包都縮到男士吃完唔覺飽......

麥記,俾D良心啦。

June 28, 2011

小南國事件

這是近期面書瘋傳的相片,之後我在"我們不是天使"的blog中看到以下這篇文。

不理真假,她所說的都很值得反思。

近日facebook 瘋傳一張相片 標題是出街食飯記得check 

那是食肆「小南國」的單據

單據上有人用原子筆圈出銀碼然後手寫一個銀碼意謂「小南國」胡亂收費,例如:新鮮有機豆漿單據顯示128 4 但手寫則標明是 $68諸如此類。

我細那單據有些價錢是蠻過總數落差有千多元。不過我覺得這張單也疑點重重 灌湯生煎飽單據 $240 , 20手寫則是 $192, $24020 , 12蚊一隻是貴但不是不合理,「小南國」不是便宜消費點再計 $192 20 $9.6 一隻我反而覺得有可疑

現在的食肆連消費總額也四捨五入, 那有小數點後的標價?此外, 也沒有以餐牌來對質, 手寫的數字是對人為 可以隨意發揮, 有人刻意惡搞也說不定。

但凡落井下石的都特別多人傳 ,是否我們被搵笨太多?好事不出門, 壞事傳千里就是這個道理。「小南國」的商譽一向不佳, 但只憑一張有疑點的單據便瘋傳, 是否未免太急於同仇敵愾,不問究竟呢?

社交網絡其中一大功能就是分享, 按一按便可以分享出去, 這個動作也好用作宣傳, 我不介意share , 作為別人的宣傳工具, 只需要那些是值得share 的。

甚麼值得, 甚麼不值得, 因人而異, 那是品味問題, 但有關乎這些事非, 應該要經分析求証才分享, 否則便淪為小報一張。

** 摘自我們不是天使

June 25, 2011

本地海鮮火鍋

打o左blog咁耐,估唔到會有人有興趣和我會面,甚至做成朋友。

多謝你們是夜再次出來和我聚會唷~~

3個完全不同background、不同性格以及其實唔係好熟gei人走在一起,由大眾娛樂新聞到私人月事都拿出來談,也許這就是幾個女人一個墟的盛況。

我喜歡這種無拘無束的感覺,though我們三人未必事事o岩channel,但輕鬆吃頓飯已很好了。

本來想先旨聲明,這頓飯沒刻意要介紹這家餐廳,因為當中blogger與餐廳熟稔,所以牛肉是有優待的~~

但我又想,既然除了牛肉特別預留外,其他都是指著menu亂點,那質素其實也沒相差太遠吧~~

所以也想談談。

這家火鍋店名高流灣,老闆是西貢高流灣原居民,有門路取到西貢生猛海鮮貨、蝦、蟹、青口全是本地貨。

故店裡也主打海鮮,另有刺身、小吃和其他大路鍋料,價錢不算平,吃海鮮的話每人起碼$300落樓。

我們想也不想,即點來海鮮湯鍋底,湯頭呈奶白色,應是用過魚骨來熬之成果,內裡足料,蟹、蝦、九肚魚、鮮蠔和蜆齊備。

喝來,下了不少胡椒,微辛,滿口鮮。

Menu另有鍋底有十多款,一般大路的沙嗲、麻辣、豬骨不乏。

之後,是幾款招牌貨,椒鹽魷魚鬚、墨魚丸、魚三角,唔錯,特別係後兩者,墨魚丸超級爽口彈牙,有墨魚香味;魚三角,即近魚鰓的一片魚臉珠肉,又嫩又滑。

最最最愛,是牛肉。老實說,我不肯定吃的是什麼部位,但估計是脂肪較多的牛脊位吧,入口具肉香,嫌偏肥,略欠嚼頭,但我強調仍然愛吃。

最過癮,是嘩鬼蝦條,油條經過猛火深炸,顏色深沉,之後釀了蝦膠,吃時直接掉進湯中待灼熟,油條仍叫脆口,驚喜!~

這個...... 一般。一下湯便腍掉,單吃也欠鬆脆,裹得太厚了。

吃時夥計左右穿插,人客坐滿每張檯,蠻嘈的,但吃火鍋也吃氣氛,成班朋友來,叫啤酒清酒紅白酒,盡興而歸。

高流灣

尖沙咀山林道21-23號一樓

3520 3800

飲食記者

一提起做飲食記者,好多人會聯想到「幸福」二字~

因為可以免費食o野、試餐廳,覺得這種寄工作於娛樂的人生是福氣。

的確,收入不多的我,卻擁有肆吃Cepage、Petrus、Gaddi's的機會,我很幸運。

不過也正好體現「你睇我好我睇你好」,我痛苦時係你唔會想像到。

曾經,我每星期差不多有4、5天要試餐廳,有時一日要食4、5餐;

而且,唔係全日攤開24小時來食,而係數小時內試曬!

個種飽到唔敢上車,驚一搖即嘔gei感覺,至今依然記得。

或者你會問,點解一日要試咁多餐廳?

其實,那時做一個主題(Feature Story),大約要試二十間餐廳,再精選最好的十間餐廳出來做採訪。

而呢十間餐廳要各有style、各有talking point,就算一樣咁好食,但性格無異都唔可以做。

所以唔試過,你唔會知。

點解又一定要試,唔直接採訪時先試呢?

好多時要付錢扮(真)客人去食,才會嚐到水準;

暴露了身份,有機會食物質素比平常好,服務也通常會好得多,這樣寫出來便不中肯。

(係咪好有臥底feel?)

重點係,每次試食,既要記下餐牌,又要觀察周邊的客人和侍應,還得感受用餐氣氛,讓文章寫出來夠live,不會死硬介紹。

你話呢種仲係咪寄工作於娛樂呢?又未必。

記得有次做乳酪題目,一天吃3間,連吃了3天,結果痾到七彩;

短期內唔想再掂乳酪......

做火鍋的同事們,一星期5天吃火鍋,吃到咀角生瘡。

這就是認真的飲食傳媒作風,不試過,沒有資格品評那間餐廳 / 食物。

而沒有全面試過香港大部分餐廳的同一款食品,亦無資格評彈這款食品做得好與壞。

這就是作為飲食記者的專業操守。(但不是每間傳媒都會這樣做,因為公司budget所限~~)

當然,自問資歷不深,也只能盡量做到專業咯~ ^^

June 24, 2011

懶惰新娘

我承認我唔想再搞結婚的事,始終還有約年半,亦始終我覺得這件事很耗時。

眼看準新娘又DIY、又打index,真的不敢恭維。

也許是自己本來就是大意的人,怕煩怕理怕指點,though逼到埋身我仍然會實行,就像當初選婚宴場地、mua都是我逼到陳生死才快快完成,這也不代表我enjoy。

一早說過了,我沒什麼準新娘那份歡欣喜悅。

辦婚事,沒什麼值得高興的,不過是將辛辛苦苦儲來的錢一揮而去;

最重要,是我能夠永遠和陳生一起,而世界公認了我們是一對夫妻,我就滿足。

影婚紗相、點樣影、邊度影、著咩影;

那天攝影師問我,我開始覺得煩。

婚宴搞咩theme、擺咩candy corner、整咩wedding cake......

一想到錢,什麼也不想搞。

我希望有位信得過的朋友,了解我的,可以篩選曬不同配搭給我揀。

我知,這是奢想,但我由衷期望有這個人出現。

亦though,我知到時我會緊張過鬼!

June 23, 2011

昆布煮花蛤(附食譜)

今天的狂風暴雨,令我念起剛過去的周末來。

那天過得很寫意,下午有陳生替我煮咖啡,是焦糖口味的。

夜晚煮了頓不錯的飯,仲可以大嚐「美」清酒!

先講下我最自豪的一道菜,昆布湯煮花蛤。(←白痴!這有什麼好自豪的!)

一早去了Jusco買昆布和日本年糕(咁就$80!),之後再去百佳買花蛤。

煮時懶醒,諗住年糕實有排煮,於是晨早掉到湯中,結果全融在花蛤殼上,好難先食到。

不過呢隻年糕很好吃,入口微甜,煙韌得來不過於黐牙~~

佢仲有好多煮法,可以燒、煎、焗和放湯煮。$36一包,可以分開幾次食。

昆布煮花蛤食譜如下:

1. 先煮昆布湯。

昆布包裝背後有教,1L水+20g昆布,20g即係幾多?唔知,但我下了2條,煲了25分鐘。

2. 另起鑊,下少量牛油和蒜蓉炒花蛤(花蛤請先用鹽水浸數小時至完全吐沙唷~),炒至花蛤開殼。

3. 下昆布湯(煮後請拿走昆布)+少量雞湯/ 水(請自行調味,因為炒花蛤時已經出了許多鮮甜的水份,再下昆布湯已經好夠味~),煲約20-30分鐘。

4. 中途可加各式心愛配料,如本菇、豆腐、年糕等。即成!

見到陳生食得開心,我都好開心。^^

而呢一晚,我仲處女下海炸o野食

我知呢個炸雞軟骨係好似燶o左少少,但幾好食唷~~ 至少用來佐清酒,很讚!

這就是我提過2次gei「美」,第一次在一遊遇上它便不能自拔~ 星期五晚我和陳生到一遊的姊妹店一門見喝不完(堂飲$550),便打包回家再喝,得返半支,唔係好夠皮~~

為了它,被炸雞軟骨彈到癲都願意...... 不過唔知在哪裡可以買它回家呢~?(我相信在餐廳喝是貴一點唷~ 唔抵!)


一遊

尖沙咀諾士佛臺1號其利中心4樓

2366 2999

June 22, 2011

生日快樂

剛過去的生日,收到了以下的禮物。

這些禮物,證明朋友/ 家人都好了解我~~

化妝品、ayu CD+DVD、食譜diary、朱古力、利是......

(抱歉... 張相鬆了~)

而這份,是頗叫驚喜的。

送自從中四已經認識的好朋友......

內裡每一頁都有meaning:

"When you smile, I smile too.

When you cry, I stand by you.

Let's find a happiness together.

Happy Birthday!!"

最重要是最後一句:

"I'm happy to have met you in my life."

成班朋友,歷盡高低起跌,是是非非,有笑有淚。

但,都過去了;

至少到今天我們仍然走在一起,有說有笑。

多謝路途上有你們在身邊。

June 21, 2011

不幸的人

又有一個故事,聽完,十級嬲,我嬲班男人賤格,連身世咁慘的女人都呃!

更嬲那女人盲目而不自愛,再一次走進圈套,而今次不知她可否走返出來。

這女子是我媽咪的朋友,她的職業不錯,本身樣貌平平,惟不幸身患乳癌,不斷的治療令她臉腫身腫,根本沒有好看的餘地。

可能因此她一直交不到男朋友,於是便從網絡認識男生,希望可以找到好歸屬。

早幾個月她認識了一個美國人,二人只在網上交談會面,那男人雖知女子身患癌症,但不久便已經說愛上她。

奇怪的事開始發生,那男人不斷借故向她索錢(而她又有俾!),有一次更說要去馬來西亞做生意,叫她一起前往,順道拍拖。

媽咪聽後告訴我,我問:你有無阻止她去?

媽說:沒有呀,她一意孤行,仲好期待,我又無謂多事。

我覺得,這女子連去馬來西亞哪個地方,去做什麼都不知情,就這樣隻身女子過去,比人賣身都不知呀!

結果我叫媽咪一定要說服她唔好去,二人要見面就叫那男人來香港好了,為啥要一個帶病的女子周圍飛?

之後,好彩這女的沒有前往,因為不久後那男人竟說自己中了槍,需要錢醫病。

這個不合情理的大話也講得出,究竟是這男人太仆街,還是女的太易受騙?

以為事情雨過天晴,怎知道早兩日,媽咪告訴我這女子快要和一個非洲男人結婚,而那男人又是在網上認識的!

當下真係扯火,妳是他媽的沒腦子麼!(對不起,我真係嬲!)

那男人想要居港權罷了(是我太小人嗎?),否則為什麼識你沒有半年就猛催你結婚?

我知以下這番說話不好聽,但,你自問自己真有能耐可以叫人這麼快娶你?

Sorry,應該話,你有什麼能耐叫一個認識你不久的人,願意接受你身患癌症的事實,還要非娶你不可?

這世界鮮有《等你說愛我》的情節,醒醒好嘛?

如果你說,有位男生,認識你久了,愛上了妳,即使後期知道你有病也不離不棄,這個當然是值得恭喜。

但你每每一在網上識到新男子便說自己有癌病,人家也只好可憐你,多問候兩句,要不然就呃你的錢好了!

這次聽後,我決定什麼也不管。

我說:媽,你說了要說的就ok了,不用像上次般刻意遊說。

對,我很失望。

不認識她,我也如此緊張,上次要不是我,媽咪根本不會落力勸服她不要去馬來西亞,然後她可能就此人間蒸發了!

但既然她不在乎,也不理性,就由她繼續做悲劇女主角吧。

記住,妳的身體已經慘遭折磨,我不希望妳連心靈都被受遭塌。

這人生是妳的。

不好的,寧願不要。

川鹵好吃

最近做緊川菜題目,發現原來傳統川菜許多都是不辣的,即使有下辣椒,目的不過是為增香而不取其辣。

這觀點有趣有趣。

更有趣的,是據典故說,辣菜通常是平民百姓/ 勞苦大眾才吃,有錢人、宮廷人員都不十分愛辣,通常一檯宴席只有1道菜是帶辣;

而看了許多內地名食家的書籍及川菜專書,說又麻又辣的食法是後現代才興起。

這可算是顛覆了人們一向對川菜的理解唷~~

鬼叫個個以為川菜一定麻得過癮、辣得起勁咩,咪搞到D餐廳係咁加紅油辣椒,務求辣死你,而你又自覺係食緊川菜!

等個個都話正宗正宗,什麼叫正宗?真的要翻上N本書才知曉。

By the way,其實我係想介紹一間川菜x淮陽菜館俾大家,她叫合江小鎮。

我沒吃過她的淮陽菜,不知是否好吃;但她的川菜卻很到家。

我知她的店址難找,基本上唔會途經而需要特登行去,由銅鑼灣times square行過去都幾遠,不過為了那道樟茶鴨,值得。

樟茶鴨是傳統川菜,用川式紅鹵滷製後,拿去爐中待樟樹葉和綠茶葉燻之其肉質入味,最後再拿去炸。

做了15年川菜的四川籍師傅直言,這隻鴨是四川那邊滷好後送來香港的,他們只需做炸的動作。

成品其貌不揚,基本上係好醜樣,但卻非常好吃!

皮肉滷得入味,咬落豐盈,肉嫩而皮滑;而且每口都吃到茶葉的香氣,不油不膩,半隻$120,很讚。

另外一道歷史悠久的捧捧雞,看落只是一般涼拌雞,但當中的紅油由店方自家煉製,奇香而不辣,另拌上芝麻醬,不過稠卻濃郁。

老壇子蟹也特別,用肉蟹先炸後連汁煮,令肉嫩滑得很;

那精髓湯汁,下了四川泡菜、泡椒、紅油等炮製,酸中帶微辣,味道特別,頗有新鮮感。

況且,四川泡菜不是間間川菜都吃到唷~~

傳統宮保雞丁,平凡無奇?才不!那雞肉嫩到不得了,好少吃到~~

有吃過熊掌豆腐嗎?上面張相的便是了,一樣不討好的賣相,卻也是超耐歷史的川菜之一,用川式白鹵水做~~ 下面的則用紅鹵水...... 原來川人真的很喜歡吃鹵菜~~

四川鹵水比潮式鹵水更香,前者味道全靠香料、藥材滲透出來,不加醬油,鮮味突出,但潮鹵就下了生抽、老抽,味道沒怎麼清澈了~~ 

以後食川菜,不妨點下川式鹵菜呀,她們的鹵豬腸不比潮式鹵水差唷~~


合江小鎮

灣仔皇后大道東387-389號麗都酒店1樓

3167 7833

June 19, 2011

我要曬"hey"

一向都無美白概念,因此從小到大我都唔會用錢去買美白產品。

始終我覺得一白可以遮三醜呢套唔work,如,你係肥婆,黑同白gei效果都係一樣~;

至少我覺得黑D可以令身材望落感覺firm D,隻手的bye bye肉無咁顯眼,隻腳都無咁粗~

(這是前年從蘇梅曬完後的感覺,下面張相就係蘇梅影gei~~)


就算整體視效沒有瘦很多,但感覺就是有種健康美,屆時我會非常唔介意著吊帶裙,though我仍然有隻粗手臂。

但可能因為體質問題,我曬完好快白返,特別係塊臉!

每次曬,我都只塗body oil + 蘿蔔汁(這樣可以曬到tan膚色),曬完仲會塗蘆薈,以免甩皮無曬黑皮膚。

但通常不用2個月塊臉就變回平常一樣...... 激死!(我要特登買深一度的粉底去營造"黑人"效果~)

早兩星期去曬,仲衰!

陳生話:你成日唔塗防曬,淨係塗BB油會唔會曬傷ga?

結果我就聽話搽他帶來的防曬油(據說類似黑鬼油那種,都是可以for曬黑的)。

點知曬完一D都唔黑lor!=_= 你睇下!!!!!! 泳衣印都無耶!

我同自己講,下年就結婚喇,今年唔曬無得曬ga喇,所以我要俾心機曬!

同埋10月影pre wedding...... 又係好煩,10月之後又無得曬,10月前曬完又驚白唔切......

哎呀!!!!!!

今個夏天,我要曬"hey"~~(小S個美白廣告... 嘻~)

Translate