October 15, 2021

【QE順產記】從見紅、催生到無痛分娩 細佬出世了!

28/9細佬終於出世了!


距離預產期(3/10)尚有一星期的周六,早上去完廁所發現整張護墊都是血,眼見陳生同小D去了小一面試,我便執好細軟自己入QE。

其實入院前真應該先上網趴文,因為純粹見血,而分量不是血崩式,加上無痛無不適,理應觀察多陣,然而因為自己唔知頭唔知路就入院了,結果在醫院足足白等了3天,沒有陣痛、毫無動靜下,到第4天才催生。

「雖然你無陣痛,不過見紅都係就生得先兆,為免BB有乜問題,你會想催生嗎?」醫生問。

當然想!

28/9早上,醫生巡完房便叫我換好袍準備落產房。

催生是什麼一回事?我完全唔知,因為事前根本沒上網search過,落到產房,wow,個種痛又係難忘。

進產房後,助產士先用人手穿水,過程好有監生被酷刑feel,張開腿,利用工具放進陰道深心處,弄破羊膜,暖暖的胎水緩緩流出......

「嘩,你好熱呀?全身濕曬。」護士問。

其實唔知班護士被穿過水未,真係好痛啊,又唔係一下搞掂,痛到出曬汗也很自然吧?

之後便打點滴放藥水催生。

由落催生藥到大痛,用咗大約2個鐘蘊釀,痛到下面想爆開,3個鐘,由開2度變開曬45分鐘。Well,人哋話第二胎快啲,我嘅理解係開度數入直路個段歷程快,而唔係成件事快咗易咗。

期間我有打無痛分娩,雖然它不能完全止痛,但至少宮縮時的肚痛大大減低,而你只會感受到尾龍骨同屎眼的無敵痛楚,變相你可以聞住笑氣,更集中的熬過去,而且那種衝擊力係可以幫你在生得時識得用力push BB出來。

係度想叉開話題同大家分享一個好有用的止痛呼吸法,好多人如我生第一胎時,覺得聞笑氣無用,甚至聞到頭暈暈,今胎我有做足功課記住呼吸法,到我痛時(不論是穿水或陣痛時聞笑氣)專注那呼吸頻率,的確有助紓緩。

那呼吸法是:深深吸入空氣數4下,呼氣時數6下,然後不斷重複,唔好急,要慢同在心裡數著,特別當聞笑氣時,陣痛係勁痛,但當你專注地數著自己呼吸係比較易捱過。

詳情亦可睇呢條片:https://youtu.be/eK9BrVX8RhM (之後佢教的2種呼吸法我無跟,不過大家都可以學定先)

到最尾,我都唔肯定自己是否已經開曬度數,只感到很想「痾」,助產士就叫大家ready,叫我試下一想痾就push,結果push了4、5下,就生了細佬出來。

胎盤尚有少許殘留在體內,結果要進行半身麻醉做手術取出,過程好慢長,最後8pm才回房間,下半身完全無感覺,人也很餓....... 

不過整體感覺比上一胎容易多了,而且因為打了催生和無痛,成件事快好多(上一胎我可是痛了48小時)。

而今胎不論是待產房、產房或產後護理房間的護士及姐姐都很好,不得不多謝她們,特別是在產房,幾位助產士都好極了,除了不斷的鼓勵我,也特別好的提早幫我叫定麻醉科醫生來打無痛,以免我到時叫唔切。

沖完涼的細佬 >V<

之後便再度陷入天翻地覆的湊仔日子了,希望細佬健健康康,食得瞓得。

二寶媽的生活,真的難以想像呢!

***

同場加映

好多人問:1. 疫情下,QE畀老公陪產嗎?

順產的話,可以!但,他要14天前已打了2針,或有3天前的核酸檢測報告證明。

另外,媽媽自己都要有核酸檢測報告證明,入院當日醫院會同你做,但如果你係一入院即刻生得,而有關報告未出,即使老公已打針或有報告都不能陪產。

剖腹產,唔可以陪產。

2. 疫情下QE有無得探病?

家人無得入病房,但媽媽可以出去交收,見一陣、傾一陣計也當然無問題。

July 8, 2021

【懷孕記事】27周 第二胎+創業絕對不輕鬆

望望日曆,原來仲有3個月就生了。

第二胎的確沒這麼緊張,什麼用品也未買,每天記掛的就是工作。

就是因為離開了傳媒的正職生活,每星期都有不同工作要你費神,人更加不能亂。加上做網商,每天都要睇住堆貨、望住盤數,唔似得有份正職做又三十六唔做又三十六,所以無論陀住個B幾重幾攰,都係要搬貨、出貨。


其實我挺enjoy這種自己控制工作時間的日子,多勞多得,又可以多些時間陪小D,她陸續有很多小一面試,對我來說辭去正職是非常正確的決定。

不過這種工作模式也很講求你的自律性,要懂得管控每天的時間表,亦因此好多人在IG inbox問我「你係點樣一日做咁多嘢」。

早上整早餐畀小D、溫書(同時出post)
下午小D lunch後送返學
之後有幾個鐘me time
買餸、打稿、訪問、出貨、整post、做家務
接小D、沖涼、煮飯
等陳生回來一起晚餐
同小D講故事、陪玩或練下小一面試
小D睡後又是另一個me time......

事在人為吧,以上種種相比起以前在雜誌工作,現在的忙都是可以自己調配,相對彈性得多(就係無老細不斷chur你已經差好遠)。

對於網商,我仍有其他想法,好想explore更多好的產品、其他銷售地點,好想同人可以面對面多些互動,講解多些有關我的選擇....... 

不過一望住個肚,有時的確無奈,因為那種累是無法死捱就可以,加上有胎盤前置,醫生再三叮囑要小心,又愈來愈多個夜晚失眠,我就決定利用這段時間找新產品,到我生完、坐完月、料理好一家大細,就嘗試開拓新市場。

唔知得唔得,不過唔試過又點知?

May 15, 2021

【懷孕記事】19周:天氣勁熱孕婦飲乜好?

 來到第19周,開始見唔到腳趾,開始行得唔係好自如,開始覺得自己走樣。



最難頂係天氣熱,對於難散熱的孕婦覺得更熱,然而冰品唔飲得唔食得,望住西瓜、菠蘿也只能得個恨字,真係好辛苦。

於是我都有破界,飲已攤一陣的凍水,又或者溝雪凍了的烏龍茶(只係加好少,大約1湯匙到一杯水),算是有些味道又解渴。

但其實孕婦仲有其他選擇,特別是出街時熱辣辣,可以自備或出街時買以下飲品,希望幫到同樣渴到爆炸但又唔想飲水的孕媽媽。



*補充:我最鍾意飲M&S牛奶,飲完個口唔會有怪味,舌頭上亦唔會有層嘢,有孕吐的準媽媽要補充鈣,買這牌子就對了!如果好凍就拎出來攤一陣先飲。

我知道好多孕媽媽避開唔飲凍品,驚寒涼對子宮唔好,亦聽說有機會令生下來的BB皮膚差及有濕疹,其實真心睇你信邊套。

我有一位讀中醫的朋友講過,唔係一味話凍嘢唔飲得,而係要睇時、地、症,以及每人的狀況。佢自己生2個,乜都食啲飲啲,BB一樣皮膚白滑,總點是咩都適量吸收下,BB仲可能無咁易誘發皮膚問題,當然我自己覺得基因遺傳也是重點。

首要宗旨係,唔好飲加了冰的飲品,因為驚有李斯特菌,是會引致早產,甚至流產的;亦唔好飲太凍的飲品,驚肚仔唔舒服。

祝大家孕期舒舒服服,一起熬過熱到癲嘅夏天。

March 23, 2021

【懷孕記事】12周的今天說:我要當二寶媽了!

 曾幻想過自己當二寶媽會是怎樣,但卻沒想過真的會發生,特別是經歷完上次小產,其實我也沒有再放心思要去生第二胎。

不過緣份到了,自會發生。我10月就要當二寶媽了!

今胎同陀小D時差不多,第8、9周開始已經唔舒服到爆炸。

上一胎是感覺像重感冒,今胎則是不斷作嘔;飲食習慣上,同樣愛吃麥記,聞到飯就想嘔,所有生果食唔到,所以便秘情況也很嚴重。

慶幸早幾天奶奶建議我飲生薑茶,胃子才開始感覺舒服了點,晚上不會太想死。

之前第6、7周,人很渴睡,一到9pm已經開不了眼上床昏掉。胸很痛,直至現在仍沒改善。

肚子比上胎脹得快,對於一直賣減肥產品,已經瘦了很多的我再次胖起來,的確需要一點心理輔導,但我相信生完我更加係好見證,證明產品work。

這段日子挺難捱,要照顧小D,又要賣PP Plus、做freelance,搬貨、拍攝訪問沒停過,即使之前曾經搬完貨而大量流血.......

我信係你嘅就係你,唔想被突如其來的事影響我的創業心,難得PP Plus同代餐愈賣愈好,我是不會停下來,更不會被阻礙步伐。

這個亦是很好的身教,告訴小D女性不應被身份、環境窒礙,我們都可以追逐想要達到的事,甚至夢想,只要你肯努力和堅持。

所以正想創業、追夢的你,不要放棄,我得你都得!

Btw久違了的超聲波,見到小人兒在肚子裡手郁郁,雙腳向天撐,的確很微妙,希望你健健康康,滿月才出來見大家啊!


March 3, 2021

【媽媽日常】當一個半全職媽原來這樣忙 但卻證明女性不會被身份窒礙

 一直都知全職媽媽很忙,但就不知道實際有幾忙,如今我完全感受到。

起床煮早餐、陪食、溫書。

轉頭又預備午餐(因為上校車時間早)、吃飯、換衫、送上校車。

之後是僅有的me time,快快處理客人及代理查詢、出貨,有時出去訪問、打稿、資料搜集,轉眼就到接放學時間。

回家休息一會,沖涼、做功課、煮晚餐、吃飯、睇一陣電視、講故事或溫書,小D上床睡覺。

終於到另一個me time,陪老公睇電視、傾偈,同步整定翌日的IG story、IG post,回覆客人及代理查詢,唔經唔覺11:30pm。

我唔鍾意夜瞓,所以一上床又到第2天無限loop。

忙還忙,不過當你覺得所做的都是自己熱愛的,以及可以控制的,都會覺得時間沒有白花,而且每天都過得很充實。

我慶幸仍然有訪問freelance,可以讓我外出透透氣;繼續收新聞稿,獲取花花世界的大小資訊。

離開正職2個月,暫時一切都很好,每天很忙,但起碼唔會每朝唔想起身。

當然,創業有它的難處,你的自律性及執行性要很高,自問也是這樣的人,所以可以一一tackle;而且相比起全職媽,我更想當一個半全職媽,繼續有自己的事業,多賺一點錢之餘,也可以讓女兒知道,世上沒甚麼可以阻擋女人想要做事的決心,即使你已經是別人的太太、孩子的母親,你仍然可以有自己的日子,過想過的生活。

所以,不要說自己沒時間或不知如何實踐,你缺乏的只是行動力與一點點勇氣,如果有渴望想做的事,不要輸給心態,更不要輸給自己,do it!

January 13, 2021

【2021年】新工作‧新路向‧終於創業了

 新一年,先祝大家2021年身體健康,事事更好。(已經1月13日了現在才update!!)

抱歉呢~ 其實早在12月尾已經離開工作了7年的雜誌,亦真正放下了編輯的工作,只是一直忙吧。

感覺是否一身輕?不算是,因為我終於要創業,全職代理減肥產品了,所以我也沒有閒著啊。

不過對於可以彈性安排日程,多出時間陪小D、看書、做運動,可以隨心做自己的事是快樂的。

而且我也挺喜歡這個代理身分,因為就好似我以前份工一樣,可以識到好多人,部分更成為朋友,大家傾下點食可以瘦、點樣衝破平台期,其實我還是喜歡做「對人」的工作。

重點是人也變得積極了,每天自律地安排好要post的feed、要處理的公事、出貨寄貨,總是有期待及學習的事,這種感覺極好。

不少朋友問我沒了正職擔唔擔心,其實顧慮是有的,但我也看到出路,即使它未必易行,卻行得開心,何況我的生意一直不錯啊(也多謝客人的支持耶~~)!

期待日後在這裡繼續分享更多日常,以及點樣食住減肥。

Translate