January 10, 2013

十大最憎

每天返工,怨氣重重,不是因為要返工,而是踏上港鐵一刻,惱氣的事便接踵而來,被打尖,被踩親皮鞋,被小朋友攝位,被老人家批踭、被師奶爭位(明明已將近要坐下去,都搶到,你話係咪叻?)、被自遊行moonwalk阻住、被路人伸懶腰打到塊臉…… 多到,自己都忘了搭一次港鐵,可以燥多少遍。 



你可以說我自找,生性暴燥,心胸狹窄,容得下太少。 



然而我也曾努力叫自己當練EQ,只是徒勞無功。 



忽發奇想,不如數個十大最憎日常事,皆因剛剛又遇到一件…… ** bold了的第二項 :p



 



一、剛才說過在港鐵發生的每一項!



二、廁所內女人大聲跟同事談話(仲要我夾在中間個隔,聽住對方無端端高叫自己「好急」然後走音,另一方大笑反問:「做乜你走音」,喂,對話內容可否有點意義?)



三、內地同胞問:哪處有名錶賣?



四、上司成日叫你morning call(我平身最憎叫人起身,連我老公都唔會叫!)



五、專心食飯時電話響,還要是公關,都未問我是否得閒,就一輪咀講自己公司的promotion,仲要講到最後,佢都未介紹自己係邊個(或者細聲 / 快到你完全聽唔到!←←← 極常見!)



六、老闆話D相唔夠生活感(睇得太多日本雜誌……實在係,香港好難找到Come Homeku:nel雜誌內的鄉村風屋子囉,點生活感jei,最慘係連攝影師都問我:咩係生活感?)



七、去完大便,無廁所水。(仲要在別人的家,真係……臭死人!)



八、打開廁所垃圾筒,驚現血滿瀉的新鮮 / 陳年衛生巾!



九、小朋友坐在我旁,隻腳不斷踢到我(喂,細佬對鞋唔污糟ga!你係咁踩我條褲,會黑ga嘛!仲有張櫈,下個坐落去便遭殃)



十、在商場,想打開玻璃門時對方永遠等你推開,而不會自己動手,最最最討厭是不幫推着嬰兒車的人開門,自己撓埋手,憎到爆!



 



都說寫日記是一種自我療法,現在心情舒緩多了,嘻。

7 comments:

  1. hahaha生活感
    香港人的生活感咪就係屋企細細, 亂七八糟咁囉
    有細路的, 一定地下鋪左七彩ABC膠墊, 成屋圖書公仔, 加個掛滿口水肩的晾衫架!

    ReplyDelete
  2. 嘩...當我連續看下去, 真係感受到你的暢快呢

    ReplyDelete
  3. 忍唔住要echo一吓~
    一. 再加自遊行永遠唔睇路拖住個喼輾過你對腳....
    四. 老公指定要我morning call, 但又叫極都唔起身, 一朝早第一件事就係俾佢整到忟哂, 仲要俾佢話: "叫我唔醒咪叫多幾次囉, 仲咩要忟?", 大佬呀, 你唔係小朋友, 點解咁小嘅事自己唔可以負責番仲要將個責任推俾人??
    九. 個細路不單止懶cute隻腳周圍踢, 有時仲會喺地鐵企上排橩調轉個人睇街, 期間極度興奮拍打玻璃打埋你個頭整亂哂你d頭髮; 你啤住佢/佢阿媽咩, 個阿媽頂多一句"你整倒姐姐喇"之後繼續低頭玩電話.....
    十. 開住門俾推BB車嘅人行, 對方可以唔該都冇句, 笑一吓示好都冇, 老奉的嗎?
    另加十一. 公司d男同事大聲講電話, 同朋友分享嫖妓心得, 琴晚果件又有幾唔掂, 浪費咗佢大嗱嗱幾百蚊, 當中粗口不絕......先生, 呢度係公司唔係討論區呀, 我專心做嘢唔想聽你侮辱女性!!

    ReplyDelete
  4. 「你可以說我自找,生性暴燥,心胸狹窄,容得下太少。 」
    勁中~我同你一樣一搭地鐵就燥狂症發作...搭巴士間唔中都會~最憎啲人開大喇叭~大佬冇人有興趣知你聽/睇緊乜囉~完全冇顧及其他人感受

    ReplyDelete
  5. 有人說:"這世界並不是非黑即白,主要是由灰色所組成。"~~~但有時候明白 不代表可以接受。haha~~just sharing~

    ReplyDelete
  6. 真係好燥地喎 =p 不過呢d又係好乞人憎,特別係5, 9, 10!!!!!

    ReplyDelete
  7. 十. 當你推開玻璃門之後對頭人還要搶閘仲要唔該都無一聲
    十一. 強國人照例不排隊;肯排隊的強國人永遠用他的胸膛貼著你的背脊...有人可以教育他們何謂social distance 嗎?

    ReplyDelete

Translate