May 21, 2012

我的好奶奶

睇唔少準新娘的Blog,發現辨婚禮其中一樣最苦惱的事,是幫媽媽 / 奶奶搵禮服。

起初我都好擔心,首先係媽咪的禮服,嚴重超budget,汗額。

然而你又會想,一生人一次嫁女,當然要隆重其事;

而且媽咪體型偏大,很難隨便在婚紗店租衫,唯有去貴一點、可以任改衣的店子買一套。

到奶奶,一向覺得她「很有要求」,愛美程度比我媽更甚,而且她說過要西式、新潮,媽媽衫這方面比較少,所以就更叫人擔心了。

但經過今日,發現自己的擔憂是多餘的!

奶奶一開始已經說不用行太多(雖然我book了5間婚紗店!),想她必然是客氣啦,但奶奶去到第一間─希臘女神,已經好快揀到2條。

可惜店子要你決定租,俾埋package錢先可以試,而且裙子太長鐵定不能改,奶奶就說再看看才決定。

去第二間,叫溫馨,樓上店。

老實說,我不喜歡這店,D衫好老土,又逼,店員taste超差,簡直是慘不忍睹的一間!

以為奶奶唔會揀o岩,想定要去第2間之際,奶奶竟然又好快咁揀o左2件。

我係咁叫奶奶再揀下先,我唔介意去睇多一間,因為我總覺得紅磡那間Paradiso Bridal會較合心水。(這間主打西式,不愛傳統主禮人衫的準新娘媽媽可以考慮下~~)

但奶奶卻猛說不用,怕三心兩意.......

結果,在溫馨選了2套。

埋單$2,480。

奶奶說太貴,猛爭住俾錢,個刻都幾感動,感動非在於奶奶願意自掏荷包,而是我感受到奶奶甚為我設想。

更覺得她是怕麻煩,才不願睇多2間,又怕浪費錢,次次問我呢間貴唔貴,邊間平D.......

雖然,是次出巡我們沒有特別get close,但我看到了奶奶嚴肅以外的另一面,有種暖意湧上心頭,心想:我以後會聽話,做個好媳婦。

開始體會奶奶開初對禮節的執著,她或許是個傳統的人,對每個婚禮上的細節都要做得妥妥當當,但正因為傳統,心底裡對子女(包括我)還是眷顧的。

多謝奶奶。是日體驗,令那二千多元顯得更微不足道。(其實本身都不算貴啦!)

No comments:

Post a Comment

Google+ Followers

Translate