估你唔到電飯煲食譜

為新屋置電飯煲，問問問，搵搵搵，發覺價錢由二百來元到五千元都有。

和老闆傾開，她說：係囉，咁多款，究竟應該點揀？

於是就做起電飯煲的題目來。 

亦正因此，便開始找「估你唔到」的電飯煲食譜來娛眾。 

原來電飯煲真係除了用來煲飯，用途仲有好多，而且非常出色，特別是用來炆煮、慢煮、翻熱都極有水準~（什麼焗蛋糕的功能暫且不提） 

不過重點是用傳統揭蓋電飯煲，按一個製，夠快同方便，不用理，就這樣做好一道菜。在網上也見過人用新式多功能電飯煲來做菜，似乎同樣不俗，炆雞翼、焗雞、東坡肉，看起來肉質都很滑溜晶瑩。 

而我亦找來了一位廚藝極棒的朋友設計了兩個食譜，用最傳統揭蓋式電飯煲來做，效果勁好，而且易到根本唔使用腦，食過，雞肉嫩得很，另一個當打邊爐用，快滾又慳位，吃得好開心~~~

電飯煲花彫雞
 

材料：
鮮雞一隻（約2斤）花彫酒10湯匙鹽4茶匙蔥段10條**另備半支花雕酒（可改用玫瑰露）

步驟：
1）將雞洗淨抹乾水，把花雕酒和鹽搽上雞的內外，醃至少三小時（過夜更好）2）將蔥段放在電飯煲底，然後放上已醃好的雞3）將半支花雕酒倒入電飯煲內，冚蓋按掣，焗45分鐘至跳掣便成。

******

火焰海鮮牛腩鍋（4人份量）

材料：
中蝦四両
蟹(細隻)2隻
蜆10隻
牛腩半斤切粒（我們選了坑腩）
蕃茄2個
洋蔥1/4個
乾蔥4粒
花雕酒6湯匙

**另備白飯，可臨尾當泡飯吃~~

做法：
1) 將所有材料放入電飯煲內，如飯煲未能容納所有材料，可將份量減半，然後在材料上點火，讓花彫酒慢慢揮發。
2) 加水、按掣，待水滾後，可隨個人喜好放入不同材料打邊爐。** 牛腩越煮越燜，還是留待最後才吃。
3) 最後可將海鮮湯加入白飯，頓成一碗美味海鮮泡飯！


吃到美味電飯煲菜式之餘，這天還再會可愛到不行的金寶！

這隻貓，一次比一次肥，然而一次比一次可愛。

只可惜這天大佬心情麻麻，只過來我腿下掃了兩遍便躲在廁所不願出來......（上次他一見我，便攤在我的筆記簿上唔肯走，超搞笑！）