久違了，好友們。
周六晚，約了數位朋友來我家聚會，主題是海鮮宴。
本來有點失望，因為有些朋友臨時來不到，幸好是夜還是過得不錯。
一檯六菜~~
個人最鍾意美極爆牡丹蝦~~ D蝦好多膏，肉又爽，唔係見買o左咁耐，生食好似無咁o徙。(但我俾佢d刺桔到手指損曬！)
蒸魚是第二至愛~ 可惜太細條，我唔敢食咁多~~
仲有凍蟹呀~~ 成八隻，又無乜人掂，結果吃剩好多。
洋蔥牛仔骨~ 幾好味，如果可以再濃味d，仲好。
煮飯的太太弄了大量薑茸，份量好比一碗飯呢......
由於等到9點先開餐，所以個個一埋檯就癲o左！
Anyway，最辛苦的真要數穿灰黑色衫的太太喇~ 成餐飯由她包辦，另加好友魚生做助手，兩位在廚房內又洗又切又煮咁，熱辣辣，真的多謝啊~~
呢個就...... 我lor~ 呵呵~ (個蛋糕from東海堂，超超超難食！以後唔會再幫襯，一次衰過一次！)
期待已久的The Expendables，終於上畫，今日亦終於睇o左喇！
我就是在台灣看到這poster即癲o左！
Honestly，這套戲是比較適合一些極愛硬「骨骨」打鬥戲 or 史泰龍的人，我就是後者。
自懂事起，老爸已經成日睇史泰龍的戲（記得當年還是用LD的~~~），不知是否潛移默化，人也愛上了這類硬漢型+滿手手筋的男人~~ 呵~
他是最好的！
那時我最愛的不是Rambo/ Rocky~ 而是有一套，他當一名出色的警察，因被陷害而入獄，在獄中不斷受虐，後來逃獄還自己清白......
（細細個睇埋d被虐片，搞到人都心理唔平衡~）Anyway，那令我開始覺得史泰龍是打不死的。
喜歡這明星沒什麼壞新聞，不花巧，不會無端端賣弄不適合自己的情慾戲~ 甚至至近年，為復出，為了市場仲有這些「男人戲」，特登找來多位著名影星拍The Expendables，自編自導自演，單是這份精神已值得表揚。
而戲裡，他一出場，人就醉了。
除了一些夾硬賣弄的男子氣概之情，整套戲的劇情簡單，過程緊湊，流暢而沒悶場，且每人性格突出，真係OK。
證明不用CG，什麼3D，乾脆利落的拳拳到肉，其實有時比電腦效果來得更實在，更好。
個人最愛史泰龍外，印象最深的還有積遜史達頓，飾演「很會用刀」的他，身手敏捷，非常精彩。米奇洛基亦一如既往的型，愛煞，出境不多已夠搶了！
如你也愛看鐵漢柔情類/ 史泰龍粉絲，來看呀，會有驚喜！
快樂，有時很簡單。
像這樣，肚子咕咕作響，便有他為我煮來一碗出前一丁。
由煲水、烚麵到倒味精的一刻，他都講究用兩煲不同熱水，為我泡來最乾淨、最爽口的麵。
他說：「煎一隻蛋好無？」
我笑了，即使我明明想吃打散了的雞蛋......
我還是很滿足的吃起這隻煎蛋，滿足地擁有他。
川式串燒開到一地都係，參差不齊，你問我我都唔係好知邊間好。
不過個人就幾鍾意食尖沙咀gei川燒。
川燒是前media人開的，所以一早已經叫曬成班記者去試。
我無試，亦無影，因為總覺得係gimmick多於一切~
但自行試過數次後，發覺水準都ok，且見佢經常爆場，其實都不會差到哪裡~ (無計，尖沙咀得佢一間做川式串燒)
先前去的時候，吃了很多很多東西，所以都忘了究竟吃過什麼...... 就事旦說幾樣吧~~
牛舌~ 有水準，嚼勁十足~ 我幾鍾意落大量辣椒粉，好惹味~
羊架~ ok wor~ 微羶不韌。
雞亦~ 就普通喇，說好食，還是日式串燒個種好食d~ 呢款雖新鮮，但無乜肉汁。
印象中，我仲食過涼拌麻辣青瓜，可以再辣d~
芝士丸，好似雪藏貨色~
燒白鱔，好正！厚身豐腴，必點啊~~
燒香蕉同菠蘿都麻麻o地~
整體而言，如果在尖咀又想食串燒，呢間可以諗諗~
最好去前即刻打個電話問問有無位先~~ (我通常都係突然想去先打去叫佢留位~~)
不過店內幾逼，預了吃得不大舒適啊~~~ 同埋盡量唔好坐近門口，因為好多人出出入入食煙，d風係咁吹呀吹，食物都凍曬lu~~
川燒
尖沙咀漆咸道南29-31號溫莎大廈10-12B號舖
2311 8101
唔知大家鍾唔鍾意食月餅呢？
我本人就幾鍾意，特別係雙黃蓮蓉（走黃）同奶皇餡~~ 後者叮熱來食，正~
而最唔鍾意gei呢，就係d新派月餅。記得有年仍在頭條時做過月餅題目，一系列介紹新出奇味月餅，d冰皮食到我想死！
X華...... 雖然係全港第一間出冰皮，不過亦都係最難食gei~ 佢D綠豆茸太多喇~
美心...... 好D~ 基本上係一年比一年好。
仲有個咩龍鬚糖月餅...... HELP！
醉榴香的榴槤月，D24臭到連愛吃榴槤gei我都頂唔順......
Anyway~ 今年月餅節又到。所以我gei檯面又開始累積月餅山~~
率先送來gei有city'super的傳統和菓匠茶屋gei日式月餅~ 不過因為好快俾人掃曬，所以無影到相。（連自己都無食過）
之後就係agnes b. delices~ 認真大手筆，一大盒連兔仔、16粒praline、一盒唔知咩朱古力+一盒星星月餅，食曬gei話可以幫我增至少4磅~
cute!!!
多多多多多！
估唔到gei係，今次佢gei星星月餅做得幾好~ 外皮咬落卜一聲，好似幾新鮮~ 內裡全是花味搭配果仁味，ok wor~ 各款都突出到自己性格~
再之後有星巴克~ 見到個樣都...... 唔知試唔試好，好似好膩咁。
仲要好多謝佢地送o左coupon俾我飲咖啡~~
其實係度好想多謝一班PR，特別係酒店的公關小姐~ 因為她們明知我幫不到她們出coverage，仍然打來問我今年想食咩月餅，要送我一盒~
小記著實感激啊~ 多謝你們！
上次整o左個海棉蛋糕，麻麻o地，結果要實d現成蛋糕，務求唔會太難食~~
屢敗屢戰，今次成功喇！
個樣係唔靚仔，但好棉，好鬆，食落仲好有蛋味~~~
呵呵呵呵~
好開心。
媽咪話：你咁鍾意食呢d蛋糕，以後都唔食買啦！
大老闆忽發其想，無端端話請食lunch。車~ 人家本來好想食麥記的，難得一天有自主權，又沒帶飯，想著"好yeah！往豬柳蛋漢堡"進發的時候，就這樣被他截擊了。
是日lunch去了藍田太平街市內的B哥小廚，叫了8個菜，全是"B哥推介"，不少菜式玩大牌檔風格，用砵仔盛載上檯，別具風味。
可惜，單看誇啦啦.，味道"小喇巴" (誇張了點...
這3款都不大好吃...
幸好，壓軸有肉餅登場，水準一流，吃得出用了不少肥豬肉，所以入口有份甘香，帶甜，嚼時沒有雪味，抵讚；面頭的鹹魚不死鹹，不錯。
這個帶子蒸豆腐也滑溜味鮮~~ ^^
其實，我承認我是本著工作時的態度"試味"，吾則，全都熱辣辣上來，吸引，也吃得出新鮮，像蒜茸炒白菜仔，白菜條條的骰有致，簡單炒來已很好吃。
唔....... 如果閣下行經，可以一試gei，因為我覺得老闆很有心，用料精心(only煮法未夠到家)，經常在店內親自幫手，又不時走來問我們意見，是個勤力的老闆啊，值得捧場。
** 她做的川菜幾好的~ 像口水雞... 少有有麻香啊，吃時記得叫她加辣至夠好吃~~
B哥小廚
地址：藍田太平街市M22舖
電話：2771 1006
無論自己平時食飯，抑或工作採訪，我都好少去朗廷酒店。
原因：無。純粹真係好少想起她。
不過經過今次，我會去多D。
個日去了食她的lunch buffet，幾surprise，二百幾蚊，淨係個頭盤已經回本。
款式好多，有沙律、刺身、壽司、冷盤、cold cut...... 唔夠！仲有！
N咁多款沙律菜，仲要係全organic tim!!!!! 加分加分！
即開生蠔，有三款，美國澳洲法國...... 美國同澳洲都好得~~
起碼4款cold cut呀！仲有即切parma ham~~
壽司~~ 水準都係咁啦~
4款唔同做法gei三文魚！！！係sustainable ga！
主菜有5、6款俾你揀，選擇比人家多。
佢推介羊，但我選了牛柳。
可能係因為餐廳做開海鮮扒類，水準好好，個牛柳鬆軟富肉汁，最正係好有牛味。滿意滿意。
周打蜆湯，個人來說幾鍾意，唔會太creamy，飲到膩，反而稠度適中，好有忌廉香。
食完飽飽，吃不下甜品了......
出品好，款式又多，相對價錢實不算貴了~~ 所以個日見都好多人幫襯，如果大家想搵日食餐好d，或有咩商務應酬，呢度我幾推介~~
The Bostonian Restaurant
尖沙咀北京道8號香港朗廷酒店低層大堂
2375 1133
這一日子在忙「可持續發展海鮮」的題目。
看著有關書籍、數據的一刻，我發現自己原來真愛這個海洋。
再訪問WWF的博士，發現其實海洋資源已達貧瘠的地步。我不想list out有關data，悶到你們慌，但，當我們愛吃海洋給予的資源時，同時更需要我們保護這些資源！
tvb現在逢星期二9:30pm會播放BBC紀錄片Life。
這是由攝製隊用了3年時間製作的。
有多個theme，包括魚、昆蟲、兩棲類等，是夜看了魚，看著飛魚在海面飛躍、小丑魚在海葵努力保護卵子、鯊魚快速獵食沙丁魚......放慢了40倍的鏡頭，展現出的，是漂亮而震撼的生命力，不其然被受觸動。
來呀，大家來看呀！
其實我們的海洋很美，很值得我們去保護，否則，再這樣肆無忌憚的吃、橫蠻的濫捕下去，我們跟海鮮的關係將會於2048年結束！
請珍惜，別待失去，才明白可謂至寶。
自手上多了一枚戒指，我開始留意起身邊的人的手，那時覺得，只要他們的左手無名指上帶上戒指，意即謂結了婚或準備結婚了，感覺很幸福。
但原來事實不一定如此，因為那枚戒指可能只為裝飾，或只為某人的小玩兒，又或是某種象徵物罷了。
即是什麼？
即是，這刻他可能在她面前帶上，但下一刻他便會脫下；就像每人都會在不同時段帶上不同面具，這刻他或許是個好老公，下一刻便成了人家的好情人，再下一刻都不知是哪人的3P、4P好玩偶了。
人多變、善變，只要功力到家，難以被人察覺，特別是我這些不大聰明，視力模糊，更不懂得看。
只能說，一枚戒指，真的不等於什麼。而我亦不過是有點失望罷了，沒其他的。
猶記得《飲食男女》有位同事是咖啡達人，她告訴我葵芳有好咖啡飲，店名叫soulmate。
「鬚眉」這名，開在葵芳一個地踎商場的角落位，不易找。
但去過，不會忘記。因為這店給人的感覺很窩心，每每來到，都見老闆兩小口子很sweet，服務態度...... 就像當你是老朋友一樣，「喂，這本non-no是最新的，你悶可以看啊~」嬌俏的老闆娘說。
我就是喜歡這種感覺。
而更重要的，是這裡的咖啡很合我意。
有人說過，一杯咖啡的好與壞，純粹在於個人喜好。
她的焦糖咖啡，是我平生第一次喝到的─不用下糖，甜度也剛好。入口很順，感覺好舒服，像將是日所有疲勞都能瀉下。才$30杯，很好。
她的pastry是來貨。不知道supplier是誰，但這次吃到的朱古力蛋糕，望落heavy，入口卻很輕很輕，可可味濃，質素很好。
連咖啡，$50 cake set，也抵。
論環境，坐得麻麻地舒服，但論感覺，絕對好過你去任何一間連鎖式經營咖啡店。
** 好戥他們開心，遲d有得轉新店，希望他們的窩心咖啡生意蒸蒸日上啦~~
騷媚咖啡 Soulmate Coffee
葵芳葵富路7號葵涌廣場2樓C20舖
6252 5551
吃到好東西固然開心，但如果在採訪時吃到好菜，更甚。
我知德記在西環很有名，不過因地點遠，也說不上方便，所以未試過，現難得工作需要便猛吃，結果還是要再度幫襯才滿足。
為的就是一道脆皮糯米釀大腸，它外皮香脆，內裡釀了花生、粟子、臘腸等炒成的糯米飯，軟糯好吃，甫上檯已傳來陣陣酥香。
我連吃了四件，嘩，肚子即時脹脹的~ 味蕾軟掉，心也幾近給它溶化，增磅也抵。
我沒有誇張，除非你不愛肥腸。
另外也狂掃了炸蝦棗和墨魚卷，製法如何講究手功，不說了，否則又整出了一篇600字的食稿。
$110 (5位用)
但，味道真的好到不得了，蝦棗外脆爽口，內裡混有馬蹄，吃時嗦嗦聲，用上新鮮海蝦，又真的味鮮到極。
再來墨魚卷，香香香香香....... 好香呢~ 同樣爽彈，嗯~ 無憾~
店內似一般酒樓，有點頹，但水準很高，個人認為她的潮菜出品好過粵菜，宜多試前者；抵讚在手功菜多，消費卻不高，還有很多坊間少有吃到的地道菜式，值得捧場。
德記潮州菜館
地址：香港皇后大道西533號地下
電話：2819 5568
營業時間：11am-3pm，5:30pm-11pm（逢星期一休息）
