July 16, 2012

真實的生活─試食,是會死人的。



有一些媒體要求好高,不單要你有經驗、EQ高同肯搏肯做,仲要有以下條件:

  • 一張愛吃會吃的嘴巴
  • 吃完超麻辣米線仲識得分麻香同辣香多寡的味蕾
  • 仲有一個食極都仲有空間gei胃
  • 兼埋一星期打完10次邊爐都仍然未厭火鍋的意志。

我沒誇張,好些傳媒機構的辦事方式就是這樣認真,她們堅持自己沒試過,便沒有資格向讀者推介,所以總會有試食環節。
(對住hea媒體,以上通通不需要存在!)

每做一個題目,要用足成個月時間籌備也無可厚非。

1. 先是開會,拎至少廿間有水準的餐廳出來,俾老總逐一點評是否值得去試食。

2. 之後靠記者食極不爛之舌,試勻咁多間,再返公司匯報。

3. 繼而再選出最精要、最值得寫的幾間餐廳出來做採訪。

都別論所揀的餐廳本身要有代表性、每間餐廳要有不同的菜式演繹等行內揀餐廳程序有機繁複,淨是那試食的過程已經夠你受!


有人聽完依然話:「嘩,咁你咪成日可以食免費餐?題目都係你自己揀啫,食自己鍾意gei食物幾開心呀!」


(荒謬!!!)


免費,是對的,記者雖然是扮顧客去試食,但自掏腰包後可以返公司claim錢。(←Well,唔係間間媒體都有budget咁樣做啊,有時唯有靠公關請啦~~)

做乜要扮顧客?用記者身份去食,人地一定出盡法寶煮到最好,那便吃不到真實狀態唷~~(←又是認真的另一表演吧)


至於食到自己喜歡的食物好開心...... 正如我之前所講,你多愛吃一樣食材,一星期餐餐食佢,真係幾想死。

試過有同事做黃油蟹題目,每日午餐晚餐試不停,結果食到嘴唇爆瘡。

Even做朱古力題目,俾埋你去法國直擊朱古力名店工場,一樣慘劇收場,令本來愛朱古力成癡的同事,3個月內不敢再碰任何有可可味的東西~

...... 哈~ 回想起來都幾有趣。


而我呢?

無,做了半年,已經食到膽固醇超標。

最記得有一次要一日內兼顧新餐廳、小專題等的試食,5小時內吃了3間餐廳,一頓buffet + 一間意大利餐廳 + 一餐蠔吧...... 記得當時身處佐敦,飽到要行去尖沙咀先敢上車!

又某一晚,男性友人陪我一晚試3間麻辣米線店,吃到第3間,他投降:「真的吃不下了!」還以為找男人來會好一點,結果同樣不濟。

有時真係覺得有天自己會試到死......



所以當你打開本雜誌,揭揭揭揭揭得好開心時,其實背後真的花不少心思。

若然大家看時可以細心"lun"下D字,俾多少少心機睇下成個layout,有機會再翻看多一兩次,遇到好的題材甚至share俾朋友睇,我們便很心足和感激,因為知道自己的努力沒有白費。

** 有次在機場看見一位乘客拿著我做的西班牙黑毛豬專題,望了一下大相,笑了笑,便揭走了,心情即時矇上層灰。
我們都很在意每一位讀者啊。

7 comments:

  1. 放心, 我次次都比心機去"lun"的

    ReplyDelete
  2. 我期期都有買飲食雜誌睇呀.但唔知是不是妳寫果間呢?我睇開"新"喎.

    ReplyDelete
  3. 我比較喜歡看人情味故事專訪

    ReplyDelete
  4. 以前以為雜誌上面寫咁多,記者就係食咁多(或者食多兩三間),原來20間入面得1/4會寫返出黎,真係辛苦曬。莫講話一星期打完10次邊爐都仍然未厭火鍋的意志,我每次打完邊爐就會厭,然後幾日之後又會解除,然後又去食,不斷循環

    ReplyDelete
  5. 好敬業喔~~加油~!

    ReplyDelete
  6. 絕對明白試食不是一件簡單的事,尤其試食已成為你工作的時候.

    ReplyDelete
  7. 我喜歡看飲食板,在文章中可以看出記者們付出的努力, 每次試食相信你們都要花許多時間來寫一篇文章, 支持你們

    ReplyDelete

Translate