January 4, 2011

除夕夜

唔講唔知,原來香港酒店好受本地人歡迎,亦原來好多香港人好似我同陳生咁,大時大節便會去book間酒店房一起過。

像剛過去的除夕,我們懶醒咁諗住唔慌多人住,於是在31日前約兩星期先打去酒店book房,首選迪士尼荷里活酒店,點知full。

再打去朗豪酒店(這是翻啅,之前已住過,個人來說很喜歡的一家本地酒店),都full。

之後陳生便瘋了似的打開電話簿,差不多每間都打,結果Excelsior爆、Sheraton滿、東涌Novotel full,就連$3,xxx間房gei尖沙咀Hyatt Regency都無房!

正失望之際,我想起了沙田Hyatt。都是純粹一試心態,結果有房,仲要好平,$1,4xx咋!(我覺得我住香港酒店gei次數可以開個本地酒店blog~)

扑取!

↓↓↓睇下間房先↓↓↓

一如Hyatt沉實作風,都是有點行政房又或基本設計feel,不過勝在一入去用色好bright,白+淺木色,同埋感覺好乾淨。

Even連洗手間的各種「邊」位「o拿」位都無污積,有企缸同浴缸。我好鍾意好大塊gei茶色鏡,同埋梳妝前兩盞小燈;沖涼液都好香,用後唔乾身。要彈的,是沒有梳供應,同埋個枕頭唔係好舒服。

打開窗簾,是這樣的景致。我問陳生:這究竟是海景定湖景?佢話:好明顯係海啦~ 但...... 呢個海真係好窄lor~~

公關E知我會來,所以特地送來一枝紅酒和praline,多謝...... 不過因為我們都帶了酒,所以無飲;朱古力....... 梗係唔可以食!

其實上文講過陳生帶給我的幸運,是我的第二份禮物,咁第一份係咩呢.......

 呢份!

咁大個女,都係第一次擁有愛瑪仕......(根本買唔起,亦不捨得買)。

當晚00:00,有人按門鈴,送來一紮好大的玫瑰,當時心底裡已經很滿足,因為....... 唔知點解人愈大愈鍾意玫瑰,同埋無諗過有禮物收。

之後他再拿出這個橙色盒子,頓時眼眶紅了...... 

 是一條絲巾呢!

他說:我記得你講過好想有條靚絲巾掛在手袋上,所以我送這個給你。

...... 努力忍住的淚水結果都是飛了出來。

所以我就即刻上facebook寫了個status:A good start of 2011.

我愛陳生。

3 comments:

  1. 下次再找不到酒店, 可以試試香港機場 Marriott, 那裡鬼影都吾多隻, 一定有房。

    ReplyDelete
  2. 咁有冇踏單車?我都喜歡CITY ESCAPE

    ReplyDelete
  3. staycation好呀,輕鬆浪漫下。陳生真sweet 爆 我男友近幾次來港都係住旺角langham好彩都有房,不過不失勝在location夠方便呀。

    ReplyDelete

Translate