咕嚕肉的迷思

影完婚紗相，我像瘋了一樣喪食。

第一晚先來趟火鍋；第二天有雞尾包+沙嗲肥牛米線當早餐，之後吃自製意粉+薯茸~~

因為無乜顧慮，所以連大稿也選了心愛的食物─咕嚕肉。

好喇，開始做research。

四周問人邊度有好吃咕嚕肉，結果發現好多人都唔識分咕嚕肉同生炒骨。

話明生炒骨，其肉自然帶骨；所以簡單來說，咕嚕肉與生炒骨的分別就是無骨和有骨咯。

製法一樣，不過究竟有雞先定有蛋先呢？

唯靈叔講過，咕嚕肉應該由糖醋骨演化，糖醋骨用排骨，所以初期應該先有生炒骨，但後來有很多人不愛o累骨，所以就轉用五花腩來做，成了今天的咕嚕肉。

問起老師傅，人人答案不同，不過大多數都話係有生炒骨先~

點都好，個人都係比較鍾意食咕嚕肉，外香脆，啖啖肉，鬆化富嚼頭，很好吃。

然而坊間做得好吃的咕嚕肉不多，因為咕嚕肉本身賣不起錢，但卻甚花功夫，由選豬肉、切工、醃製、酸甜汁、炸功到收汁，處處都是技巧。

誰會很花心機？

--

講咁多，好悶呀！！！

不如簡單點數下坊間哪裡有好吃的咕嚕肉啦~~~

個人最愛 + 好多懂吃的行家 + 名食家都認為首選有....... 陸羽。



今天有幸走入廚房，見識大廚禤師傅技藝，同埋點解呢客咕嚕肉咁出名。

一句到尾，傳統+好吃的咕嚕肉做法好多大廚都知，水準高低就在乎那大廚的心機+實力喇。

** 不過有人話陸羽裡面好階級，VIP、名人就可以坐2、3樓，普通食客就座地下，而食物水準亦因而有別~~ 我編輯話唔覺得咕嚕肉好吃，唔知係咪咁gei原因，不過我今日親身試過由大廚煮的，又真係好好食喎~~ 所以...... 希望大家去到都可以吃到好吃的啦~~


第二好吃：得龍。

其實她和陸羽一樣做得好好，同是山楂餅煮汁，每件豬肉掛著汁，食完碟底一滴汁都唔見，這些都是技藝了得的明證啊~~

其他選擇，有蛇王芬、桃花源、港大校友會等

以下呢個係蛇王芬出品，個汁做得無陸羽咁好，但舊肉食到尾仲係脆口，而且都幾鬆化。



如果大家知道邊度有好食咕嚕肉，都不妨留言話我知咯~~ ^_^

陸羽茶室

中環士丹利街24號地下至3樓

2523 5464