婚前減肥一：四大天王餐（第1-3日）*3日減2磅

上次次為了影pre-wedding，試過唐安麒的瘦身餐單後，發現好work，叫我驚現這位女士的學識更真的幫到人。

所以今次在辟穀前我決定先用十日進行她的四大天王餐。

先讓大家了解食法吧：（內容copy自唐安麒blog）

第一至五天：只可進食「四大天王」食物，量不限，吃到飽。

第六至十天：除了「四大天王」食物外，可加入蔬菜（水果不要），50%「四大天王」，50%蔬菜，如：番茄、菠菜、西蘭花、黃瓜、芥蘭等，量不限，吃到飽。但不可以吃澱粉質類，如米麵等五穀、粟米、薯類。

* 可用「少量」植物香料，如醋、粗鹽、蒜、洋蔥、蔥、檸檬、辣椒、芥末來調味（糖不可）。

* 可喝咖啡、茶。

* 煮法：清蒸、燉、炒、煎，但不可加油。以清蒸、燉為首選，可同時把多餘的油脂釋出，所以浮在表面的油絕不可吃。可用無毒性易潔鑊。

** 沒有列出的食物，就是不可以吃的！

注意事項：

一、此餐十天為一療程，每月只可進行一療程，絕不可長期進行！

二、每天「必須」喝1,500c.c.以上清水；

三、每天喝一杯幫助排便的茶，如「荷葉草本茶」、「玫瑰草本茶」，因純蛋白質餐容易出現便秘。

四、完全避免醣類及脂肪食物。

五丶出現口幹、口氣情況可多喝水及咬嚼無糖香口膠。

講完。


一向是食肉獸的我，以為這餐單好易跟，但完全係癡o左線咁難跟！

恕我冒犯了各位宇宙人 / 安麒兒（一班追隨唐安麒的粉絲的稱號）：

我不知道你們一向的飲食習慣如何，但我覺得這個餐的食物是完全不能放進口（除了菜）！肉，不能下油，唔煎得，煎o左，好易焦，大家上yahoo blog到search下有食過呢個餐的blogger影的食物相，雞肉都是焦的，硬曬軚，點食？

就算俾你烚同蒸，味道還是不行。

或者係我份工作寵壞了我的味蕾，所以要吃這些簡直要了我的命！（我強調，唐安麒的宇宙自然飲食法可沒有這樣harsh，易跟好多，至少可以正常煮食~~）

我甚至搵過2位廚藝精湛的朋友，叫他 / 她們幫我設計餐單，全部擰曬頭...... 定係，只怪我們3人都是煮飯白癡？

同埋仲要一日三餐都只吃肉 / 海鮮，嘩，食完個負作用真係無得頂（但好多人都無事.... 可能我身體唔適合咁減法）~~ 先是無力，繼而胃頂+灼熱，之後仲頭暈暈，完全集中精神工作...... 去到第3日，已經想食薯片。（我未試過咁快投降的.......）

而正當我真係想打開包熱浪之際，即係第3日的下午5時，我決定上磅，希望用磅數說服我：你要吃這包薯片去令自己快樂！

結果...... 竟然是輕了一磅，還要是剛吃了午餐的情況下！

WAO........ 再一次，唐安麒真係好令人amazing！（←你是人格分裂嗎？）

Anyway，我都分享下我的餐單吧~ 我無完全跟足，不過3日減1磅，都ok啊~


第一天
早餐：沒有吃，因為烚蛋預錯了時間，帶了隻未熟的蛋返公司 =_=
午餐：蒸水蛋 + 煎雞柳（下了芥末和海鹽醃，慢火烘它）
晚餐：刺身 + 燒鯖魚 + 燒牛肋骨（燒物全沒有下油，不過食牛肋骨已經好錯喇~~）
便便：零！
水：飲唔到1500cc已經想嘔，我估都有1000cc吧~

 

第二天
早餐：火腿（←又錯！）+ 脫脂奶
午餐：牛肉（下少許雞湯、韓式辣膏及茄膏灼熟..... 明顯是亂煮務求有味~）
下午茶：茶葉蛋（鴻福堂買）+ 低脂乳酪
晚餐：煎西冷扒 + 昆布湯烚蜆
便便：小量
水：都係飲唔夠
* 有做30mins運動

 

 


第三天（想嘔呀唔該~~~）
早餐：火腿 + 烚蛋
午餐：煎牛扒 + 焗了個蒜頭做醬
晚餐：..... 麥記......
便便：正常

係呀！我輸o左俾好無質素gei麥記手上！

因為今晚掛住行IKEA，捱了2個幾鐘餓，頭開始暈，人的心情愈來愈差~

而陳生又剛上完課一樣累，於是就想也不想，麥記吧。

無ga喇，個1磅就咁無o左，呢刻係有些guilty。

不過今次經驗話俾自己聽：我唔識合食肉減肥法！

始終都是貪吃的人，如果跟米施洛的按份量方法可以令自己的減肥過程好過一點，我還是按份量去吃算了（我貪快，所以先想試下四大天王餐，睇下係咪咁勁可以10日瘦5磅！）~ 至少我可以和同事出去食魚蛋米、早上可以食蛋治、晚上可以食意粉......

不好意思我的身體，辛苦你吃了2.5天超難吃的肉餐......

明天起，再來過，轉返米施洛方法減肥去吧！

同志仍需努力~~

** 補充，今朝（2/9）上磅，又輕了一磅，即3日可減2磅~~ 證明呢個餐真係落磅落得好快，就看各位對減肥的決心如何了~~