May 27, 2011

港土茶記後記

睇完blogger鬧爆港土茶記,其實都o岩gei,誰會為有機放棄味道?(有,咪做緊有機個班人lor,一般人除外~)

我自己事後同老闆娘傾返,佢都自認食物未必及得上別人,始終自己做的方法多自創,不按傳統做法,跟我們既定以為的味道很不同,像叉燒,一定無蜜味,又無肥瘦兼備個種豐盈口感,但她希望以不下多餘調味/ 添加取勝,務求吃得健康。

各有各說法啦,我去採訪,見到有heart的餐廳,就算不大好吃,也會盡量抽出值得談的點子,樂意加多幾筆讚嘆。

亦明白好多人覺得店子是gimmick,我一半一半睇法吧,會疑惑為何她偏偏要開在中環,仲要L Place地下,唔係想搶鬼佬生意為乜?但又想,$68一碗麵,都幾難開在其他平民地區吧~(而且食物又沒有我們既定的美味指標在其中)

Anyway,希望她們既保持到有機/ 天然之餘,也可以有返香港人吃慣的口味水平啦,否則好難叫人欣賞。(始終你話有機天然jei,我點知!)

******
再睇完朋友blog,她談起婚後恐懼症。

老實講,我早就有了。

擔心的,是見得對方太多,沒了期待。

愛情要保鮮,現在有時想創出一點小玩兒氹對方開心已經很難,點子乾塘,何況一齊住了以後?

另一方面,現在有期待的心去見對方,期待今個周末拍拖,但一起住了以後,不就是沒了期待嗎?

結了婚的同事說:到時你gei心態會唔同ga喇,簡單係屋企一齊執一日屋已經好滿足。

我知,我不是說要日日有驚喜,我覺得經常surprise或被surprised是很累的事,只是...... 我想大家仍然有新鮮感。

也許,是怕自己婚後所做的都變得例行公事,煮飯、洗衫、執屋.......

我不想現在認為的樂趣,到時會變成「最好不用做」的感覺。

Btw,連住哪一區還沒想到,距離結婚還有年半,想這麼多也很廢吧。

別想,現在就為婚姻打好根基先。

2 comments:

  1. 你有婚後恐懼症, 我有婚前恐懼症....

    同你一樣, 我都成日煩住屋既問題, 覺得連住邊都唔知又點結呢? 但想深一層, 幾時一件咁開心既事會同咁多實際既野掛鉤?

    ReplyDelete
  2. 其實我男友早兩星期先求婚, 但我到依家仲未應承~

    我同佢都未開始商量住邊, 因為我覺得而家好貴, 想租住一兩年等個價回番d先買, 但佢又覺得租樓好唔抵, 想買~ 不過依家個價咁, 買都只可以買個好細既單位.....學你話齋, 如果大家住既環境仲差過自己做女同做仔果陣, 唔通又會開心咩....定一話等兩年 (or even longer) 等到買倒先結? 唉.....

    ReplyDelete

Translate