May 7, 2011

火鍋新寵

好辛苦地開完被炮轟gei會,之後Happy Friday,和陳生撐檯腳。

你知嘛,銅鑼灣沒有太多火鍋店,就算有,都總有你不幫襯gei理由:

不倒翁太太太貴(好似過了10pm有優惠)、澳門豬骨唔太好食,另外總有d任點任食,講真,本人至怕。

呢晚來到謙記,有驚喜:食物選擇滿意、水準好、坐得舒適、有電視睇(死火,從來不看無線劇集的我竟無端端追起洪武三十二來......)、收費合理。

逐樣講下啦~~

店設兩層,乾淨光猛,大檯卡位vip房,任均選擇。呢日我就坐個大卡座,望住大電視,好過癮,惟風口位,吹到癲。

一睇鍋料紙,特別是湯底,愛啊~~ 非普通清湯沙嗲芫茜,而是清湯坑腩、番茄牛腩、木瓜魚頭、粉葛豬骨..... 約十來款,$78例牌、$98大,三人來叫個例已經可以翻肚!(好叻今次竟然記得價錢~)

我叫了清湯坑腩,ok wor,真係煲了好一段時間才出來,湯面還浮有油(泡?);坑腩,誠意之作,好少火鍋店的湯底願意供應,份量多,起碼10條,愈煲愈腍,我勸大家唔好急住食。

其它食物,全都大路,海鮮丸類肉類苞菜餃子,最鍾意,不花巧,零創意,吃原味就是最好的火鍋經驗。

牛有3款,1款俾人畫花o左,睇唔到係乜,應該係雪花肥白,另有山東牛頸脊和本地手切肥牛,講真,火鍋牛肉不嬲都係牛頸脊最好,當然點前者了,但如果係本地仲好~ $178,好大碟。

我們兩位食肉獸還吃了炸魚皮、韭菜餃、豬面青筋(有豬臊味,千萬別點!)、墨魚滑、粟米、白菜仔、唐生菜。

繼牛以後,最最最好食係韭菜餃(有8大件),餃皮好滑,真係juicy,餡料又多~~

墨魚滑都ok,夠彈,只略嫌不夠爽。

D菜都好乾淨bor~~ 抵讚。(我一向好怕食火鍋店的菜,總覺得她們亂咁洗~)

其實我仲好想試奶皇水晶飽、魚皮餃、水餃,但實在太飽了......

上網睇返d人食評,發現鍋料、湯底都轉了好多,希望你們來到都吃到我個清湯腩、牛頸脊同韭菜餃啦,相信你們都會喜歡。(如果你愛牛的話~)

抵讚的,還有最後附送的甜品:紅豆糕和芒果糯米卷,我只吃了後者,讚!差點想搶埋陳生個份,哈~~(好過d舖頭只適供應無味糖水~)

整體上,有2個地方要彈,一個係醬料費,$38,個人覺得幾唔值~ (其實呢度每人埋單$200-$250啦~)

第二,係服務,唔係差,但都唔係好,最討厭係水都唔俾杯你,係咁逼你叫飲品;都算,但你唔好催嘛!走過來問3、4次,講真,我實點喎,考慮下都得gra!(火)

但...... 都算少事啦,我唔會為呢兩件事放棄呢度。

謙記火鍋

銅鑼灣謝斐道408-412號華斐商業大廈1及2字樓

2838 6116

4 comments:

  1. 流哂口水。。。 睇落乾淨企理,可以一試!

    ReplyDelete
  2. 也不錯!各有喜好。

    ReplyDelete
  3. 有無試過天后既上品, 都唔錯! 不過成日都好full~

    ReplyDelete

Translate